Fuqia shëruese e gjetheve të dafinës dhe vajit esencial, përdorimet dhe disa këshilla praktike
Dafinën fatmirësisht në vendin tonë e gjejmë kudo, në çdo oborr apo rrugë.
Kjo bimë hyjnore është e pasur me vitamina e antioksidantë natyralë që njihen për vetitë në mbrojtjen e shikimit, por edhe mbrojtjen nga kanceri i mushkërive.
Dafina ka në përmbajtjen e saj një nivel të lartë të mineraleve si bakri, potasi, kalcium, mangani, hekuri, zinku dhe magnezi.
Dafina është përdorur nga paraardhësit tanë në rastet e shfaqjes së epidemive, ndërsa romakët e lashtë e përdornin dafinën për të trajtuar sëmundjet e mushkërisë.
E përdorur gjerësisht në mjekësinë tradicionale, kjo barishte konsiderohet gjithashtu si një simbol i nderit, grekët e lashtë kurorëzonin heronjtë e tyre të luftës dhe Olimpët me një kurorë me gjethe dafine.
Në ditët e sotme gjethet e dafinës, vërtetë meritojnë një vend nderi në fushën shëndetësore,
këto gjethe kanë aftësi fantastike të detoksifikojnë trupin, përshpejtojnë procesin e shërimit, mbrojnë organizmin nga infeksionet,
mbajnë diabetin nën kontroll, reduktojnë inflamacionin, rregullojnë frymëmarrjen, përmirësojnë tretjen, lehtësojnë dhimbjet nga reumatizma, luftojnë bronkitin, parandalojnë gripin e shumë të tjerë. Ndaj në ‘Bima dhe Shëndeti’
në emisionin “Rreze Dielli” në Report TV, me specialistin e bimëve mjekësore Ylli Merja tregojmë arsyet se përse duhet ta përdorim dafinën më shpesh në jetën e përditshme dhe si kombinuar me produkte të tjera, t’a përdorim në kurim të një sërë problematikash shëndetësore.
“Në gjethet e dafinës kemi mbi 50 përbërës fitokimikë, por më i rëndësishëm është cineoli, i cili ka veti që të zgjerojë bronket dhe rrugët e frymëmarrrjes. Tjetër përbërës është linaloli me veti qetësuese, shkalla virusale në organizëm do të ulet” thekson Merja në fillim të bisedës, duke vijuar me të tjerë përbërës të rëndësishëm që gjendjen tek dafina si eugenoli një antibakterial i fuqishëm, alfa-pinen dhe beta-pinen janë antimikrobike prezente tek bima e dafinës. Gjithashtu taninet, flavonoidet apo acidi kafeik janë antioksidues dhe antiinflamatorë.
Pyetjes së moderatores Androniki Kolka, se çfarë i ndodh organizmit pasi konsumojmë një çaj me gjethe dafine, doktor Ylli Merja i përgjigjet:
“Së pari çaji i dafinës, përveçse do të na japë një shije të mrekullueshme, do të na qetësojë kollën, ndihmon në pastrimin e rrugëve të frymëmarrjes dhe ka veti që të eleminojë sekrecionet, nëse kemi. Tjetër veti që sjell për organizmin konsumimi i çajit të dafinës është një oksigjenim i trurit dhe trupit, ndihmon në tretjen dhe jashtëqitjen, si dhe largon gazrat. Në këtë drejtim kjo bimë zë një vend të veçantë. Gjithashtu dafina ka një meritë të pa mohueshme në drejtim të qetësimit të dhimbjes së kockave dhe kyçeve duke e konsumuar si çaj, por dhe duke përdorur vajin esencial të saj”.
Kujdes duhet treguar dhe në përzgjedhjen e gjetheve të dafinës kur e blejmë në treg, “Sa më e errët të jetë ngjyra e saj në kafe, aq më e vjetër është ajo gjethe dhe aq më pak vlera shëndetësore do të ketë” thekson Merja.
Specialisti i bimëve mjekësore tregon si të perdorim gjethet e dafinës si dhe vajin e saj në dobi të shëndetit. Sa i takon problemeve të ndryshme shëndetësore tek fëmijët, Ylli Merja e sugjeron për:
· Lirimin e rrugëve të frymëmarrjes dhe qetësimin e kollës: Përzieni një lugë çaji vaj ulliri ose basani me 3-4 pika vaj dafine. Vendosim pak nga ky vaj në hundë dhe lyeni gjoksin, brinjët, shpatullat e fëmijës. Zieni në 200 ml ujë 3-4 gjethe dafinë. Jepini fëmijës të pijë çdo 1 orë nga 1-2 lugë çaji ose supe në varësi nga mosha
· Largimin e gazrave nga zorrët, qetësimi i dhimbjeve të barkut: Në 200 ml ujë zieni 2 minuta 1 lugë mendër dhe 2 gjethe dafine. Pini çajin me lugë çaji çdo 1 orë, ose nga një lugë supe për më të rriturit
· Hollimin dhe eleminimin e sekrecioneve, qetësuese e kollës: Në 200 ml ujë zieni 2 minuta 2 gjethe dafine dhe 1-2 fije çaj jugu
· Uljen e temperaturën së lartë dhe nxitjen e djersitjes: Në 0.5 litra ujë zieni 2 minuta 2 gjethe dafine, një lugë lule shtogu dhe një dorë zhumbricë
· Luftimin e mykut në lëkurë dhe gojë: Në 0.5 litër ujë zieni 2 gjethe dafine dhe 1 lugë rigon. Shpëlani zonat e irrituara të lëkurës nga myku
Ndërsa për më të rriturit Merja tregon disa receta tepër efikase, duke theksuar gjithmonë rëndësinë që ka koha e zierjes së çdo çaji bimor. “Nuk duhet të kalojë më shumë se 2 minuta zierje, pasi do të humbasim një pjesë të mirë të vlerave, nëse do të kemi vlim më të gjatë” thekson ai. Gjethet e dafinës dhe vaji i dafinës vijnë në ndihmë për shumë problematika shëndetësore, ku disa prej tyre janë:
– Qetëson kollën, liron rrugët e frymëmarrjes, lehtëson nxjerrjen e sekrecioneve: Në 1 litër ujë zieni 2 minuta 3 gjethe dafine, 1 dorë zhumbricë, 1 dorë lule bliri, 1 lugë lule shtogu. Pihen 2-3 gota çaji në ditë para buke. Hidhni në çdo gotë çaji 10 pika propolis me rigon
– Lehtëson largimin e gazrave, lehtëson tretjen: Në 1 litër ujë zieni 2 minuta, 3 gjethe dafine, një lugë kumak, një dorë bar blete, një dorë mëllagë dhe 1 lugë mendër ose finok. Pini 2-3 gota në ditë
– Anti inflamatore dhe anti astrigjente: Në 1 lugë supe vaj recini hedhim 7-8 pika vaj dafine dhe lyejmë kyçet që dhembin 2 herë në ditë
– Ndihmon në nxjerrjen e gurëve në veshka: Në 2 litra ujë zieni 2 minuta një dorë lëvore dafine, një dorë ashe, një lugë fara shalqini, një dorë fier guri. Pini 4-5 gota në ditë
– Nxit mbirjen e flokëve: Në vatrat e alopecisë vendosim lëng hudhre ose qepe. Mbi të hedhim dy pika vaj dafine dhe masazhojmë vatrën 2-3 minuta
– Tingturat alkolike: Në 100 ml alkool 70% hedhim 30 gr gjethe dafine. Lërini 10-12 ditë dhe kullojeni. Pini 3 x 10 pika fëmijët e vegjël pas buke dhe 3 x 20 pika të rriturit.